بخش صحت‌روانی شفاخانه ولایتی غور به‌حمایت مالی یونیسف فعال شد

مسوولان صحی حکومت طالبان در ولایت غور تایید می‌کنند که بخش صحت روانی در شفاخانه ولایتی غور در دو بخش مردانه و زنانه فعال شده است.

عبدالستار موفق، رییس صحت عامه در ولایت غور می‌گوید که این بخش از شفاخانه به‌کمک مالی موسسه یونیسف روز یک‌شنبه، سوم میزان فعال شده است.

در همین حال، عبدالاحمد نوری، رییس شفاخانه ولایتی غور می‌گوید که بیش از ۵۰ درصد باشندگان این ولایت از مشکلات مختلف روانی رنج می‌برند.

ولایت غور با مجهز شدن به‌بخش صحت روانی می‌تواند مشکلات بیماران زیادی را درمان کند‌.

شهروندان غور با ابراز خوشحالی از افتتاح بخش صحت روانی شفاخانه ولایتی غور می‌گویند که با فعال شدن این بخش، اکثر مشکلات روانی و صحی شهروندان این ولایت حل شده و دیگر نیاز نیست تا بیماران روانی به خارج از ولایت منتقل شوند.

به‌گفته کارشناسان، به‌دلیل چند دهه جنگ و فقر در افغانستان بخش بزرگی از شهروندان کشور دچار بیماری روانی هستند.