سازمان همکاری شانگهای: هزاران عضو گروه‌های اسلام‌گرا در مرز افغانستان و تاجیکستان تجمع کرده‌اند

رئیس کمیته اجرایی ساختار منطقه‌ای ضد تروریسم سازمان همکاری شانگهای (SCO) گفته است که هزاران تن از اعضای گروه‌های اسلام‌گرا در امتداد مرز افغانستان و تاجیکستان تجمع‌ کرده‌اند.

پس از کنفرانس سیکا که در آستانه برگزار شده بود، نشست دیگری روز سه شنبه، بیست‌وششم میزان تحت عنوان “همکاری بین‌المللی و منطقه‌ای امنیت و مدیریت مرزها برای مقابله با تروریسم” به میزبانی تاجیکستان در شهر دوشنبه برگزار شد و موضوع تجمع اسلام‌گرایان در آنجا مطرح شده است.

اورسلا میرزایف، رییس کمیته اجرایی ساختار منطقه‌ای ضد تروریسم سازمان همکاری شانگهای در این نشست بین‌المللی گفته است که ۱۳ هزار و ۵۰۰ تن از اعضای گروه‌های اسلام‌گرا در امتداد مرز افغانستان و تاجیکستان تجمع کرده‌اند.

به گفته‌ی میرزایف این تعداد از اسلام‌گرایان در امتداد مرز، شامل از اعضای گروه تروریستی داعش نمی شود. رئیس جمهور تاجیکستان نیز گفته است که حدود ۱۲ گروه تروریستی در افغانستان فعال است و امنیت کشورهای عضو سازمان شانگهای را تهدید می‌کند.

خبرگزاری آسیا پلاس تاجیکستان به نقل از میرزایف گزارش داده است که در سال گذشته با بازداشت ۱۵۰۰ اسلام‌گرای تحت تعقیب از دست‌کم ۴۰ حمله‌ی تروریستی بر کشورهای عضو سازمان همکاری شانگهای جلوگیری شده است.

رئیس جمهور تاجیکستان در نشست سران کشورهای عضو کنفرانس سیکا در آستانه گفته بود که هزاران انتحاری و مجاهد در افغانستان فعال است. او در نشست همکاری‌های منطقه‌ای و بین‌المللی برای مقابله تروریسم در تاجیکستان نیز تاکید کرد که برای جلوگیری از خطرات احتمالی تروریسم در اطراف افغانستان کمربند امنیتی ایجاد شود.

آنتونیو گوترش، دبیرکل سازمان ملل متحد نیز در پیامی به این نشست، امنیت مرزی را کلید مبارزه با تروریسم خواند.