سفارت امریکا در تاجیکستان برای شهروندان افغانستان، روسیه و ایران ویزا می‌دهد

سفارت امریکا در تاجیکستان اعلام کرده است که پس از این شهروندان افغانستان، روسیه، ایران و کشورهای دیگر می‌توانند ویزای سفر به امریکا را از شهر دوشنبه بگیرند.

این سفارت در صفحه فیسبوک خود نوشته است که روند توزیع ویزا از اول ماه نوامبر آغاز شده و قرار است که برای ماه‌های دسامبر، جنوری و فبروری ادامه یابد.

سفارت امریکا گفته است که شهروندان روسیه، ازبیکستان، افغانستان، ایران یا کشور دیگر می‌توانند برای اخذ ویزای غیر مهاجرتی در سفارت ایالات متحده در دوشنبه اقدام کنند.

سفارت امریکا در افغانستان پس از سقوط کابل به دست طالبان تعطیل شده و امور این سفارت از دوحه قطر به پیش برده می‌شود. همین‌طور سفارت امریکا در تهران نیز بسته است.